EKSODI I RI – 182 mijë shqiptarë lanë Shqipërinë në 5 muajt e parë të 2019-s. –

Nga: Ilir Nikolla

Shifra katastrofike e braktisjes së vendit konfirmohet nga raportimi formal i INSTAT-it mbi hyrje daljet në Shqipëri për 5 muajt e parë të 2019-s. Edhe pse shifrat nuk përkthehen mirëfilli si shifra “azilantësh”, raportimi muaj pas muaji i hyrjeve dhe i daljeve ka një bilanc negativ, duke pasur rreth 30 mijë dalje më shumë çdo muaj. Edhe justifikimi i afatit 90 ditor të qendrimit në BE është rrëzuar, meqenëse për 5 muaj rresht në asnjë moment, hyrjet e shtetasve shqiptarë në vend nuk kanë qenë më të larta sesa daljet, duke vertetuar hipotezën, se shqiptarët e dalë nga vendi në janar-maj 2019 nuk po kthehen.

Sipas raportit të INSTAT, për 5 muajt e parë të vitit, kanë dalë nga vendi afro 2,2 milionë shtetas shqiptarë, ndërkohë që janë kthyer vetëm pak më shumë se 2 milionë. Diferenca neto është 182 mijë veta dhe sipas një analize të ritmeve, mendohet se deri në fund të vitit, kjo diferencë, në një version optimist (pra, nëse nuk parashikojmë një rritje të ritmeve të braktisjes së vendit, çka e parashikojnë shumë analistë) shifra e shqiptarëve që do ta braktisin vendin mund të mbërrijë në 300 mijë veta. Shifra është e paprecedentë edhe për 6 vitet e qeverimit të Edi Ramës, ku mendohet se vendin e lanë rreth 500 mijë shqiptarë, pra afro 100 mijë në vit, dhe flet për një eksod të vërtetë, i cili shkaktohet jo veç nga kushtet e vështira ekonomike në Shqipëri, por në radhë të parë nga kushtet e sigurisë si dhe nga inkurajimi që vetë autoritetet po i bëjnë braktisjes së vendit. Arsyet pse qeveria po inkurajon braktisjen në masë të vendit nuk dihen, por fakt është se këto ritme do të ndikojnë në rënien e mëtejshme të ritmeve të rritjes ekonomike si fillim, por më vonë edhe në rënien e skemës së pensioneve dhe në kolapsin e mjaft bizneseve që kanë nevojë për krah të ri pune.